توارد خواطر

شاعرة فوق الغصون...وشاعر في ظل دوحه

ضمت الاقدار فيمابينهم واضحو قرابه

كل ما جرت مواويل الحزن تنقض جروحه

بينهم في آحزانهم حد كبير من التشابه

تشتكي الآحزان لآغصان الشجر في كل نوحه

والمولع يشتكي حزنه على قوس الربابة

النغم في صوتها فيه الآسى يثبت وضوحه

قام شاعرها يترجم ما تحسه بالنيابة

حالها حاله..وحزنه حزنها..والبوح بوحه

يتمنى لو يعلمها القرايةوالكتابة

لآجل تكتب قصته وتحطها في وسط لوحة

قصة اللي من فراق حبيبه يشكي صبابه

الحبيب اللي جمع كل العذوبة والملوحة

جعل داره للحيا من وابل يمطر سحابه

رفرفت عند الوداع وكنها ترجو السموحه

ودها ترحل عسى بيت الحزن ينصك بابه

راح شاعرها يهل الدمع وهمومه تلوحه

ضاق من جمر الفراق اللي على الكبد التهابه

من يشوفه عقب طارت كنها طارت بروحه

يوم قام يجاذب الونات من جرح لجابه

ماهو بكيفك تشيد الحب وتهدم صروحه

لاعلى قلبك غلاف ولا على عينك عصابه

بس..ساعة ينصدم بالياس ويحطم طموحه

وش يسوي..؟!ذا سؤال الحب من يلقى الاجابة؟




وسلامتكم............انشالله تحوز على سموووو اعجابكم.